Samkeppni um myndverk á forsíðu Símaskrárinnar 2010

Gífurlaga góð þátttaka var í samkeppninni. Alls bárust Já 1.530 tillögur.

Hér eru þær þrjár sem eru í 1. -3. sæti

Tillaga 1:

Tillaga 2:

Tillaga 3:

Anna Ingólfsdóttir og Elísabet Brynhildardóttir hljóta 1., 2. og 3. verðlaun í forsíðusamkeppni Símaskrárinnar 2010
Ótrúleg tilviljun að þrjár efstu tillögurnar voru allar eftir sömu höfundana

Reykjavík, 6. janúar 2010

Sú ótrúlega staða kom upp þegar þrjár efstu tillögurnar í forsíðusamkeppni Símaskrárinnar 2010 voru valdar að þær reyndust allar vera eftir sömu höfundana, vinkonurnar Önnu Ingólfsdóttur og Elísabetu Brynhildardóttur. Verðlaunin voru afhent í húsakynnum Já í dag.

Alls bárust um 1.530 tillögur í samkeppnina en skilafrestur rann út 1. desember sl.Fimm manna dómnefnd valdi þær þrjár tillögur sem henni þóttu bestar og síðustu tvær vikur hefur almenningi gefist kostur á að veita álit sitt á tillögunum þremur í netkosningu á vef Já. Tekið skal fram að tillögurnar voru ekki merktar með nafni og því hafði dómnefnd enga vitneskju um nöfn höfunda fyrr en að vali loknu.

„Úr miklum fjölda innsendra tillagna báru nokkrar af. Leyfilegt var fyrir hvern og einn að senda inn fleiri en eina tillögu. Tillögur voru merktar dulnefni. Þegar verulega góðar tillögur birtast er ekki um þær deilt – það verða allir sammála, því þær tala til hjartans. Símaskráin er ekki bara nytsamleg – hún er hjartans mál. Dómnefndinni til mikillar furðu áttu sömu aðilar allar bestu tillögurnar. Það var huglægt mat – en álitið var samdóma,“ segir Guðmundur Oddur Magnússon, prófessor við Listaháskóla Íslands og formaður dómnefndar.

Vegleg verðlaun voru veitt fyrir fyrstu þrjú sætin; 700.000 kr. fyrir 1. sæti; 200.000 fyrir 2. og 100.000 fyrir 3. sæti, auk heiðursins sem í því felst að vinningshafar fá listaverkið sitt framan á um 150.000 bækur sem berast inn á meirihluta heimila landsins og eru geymdar á vísum stað í heilt ár. Anna og Elísabet hljóta því samtals eina milljón króna í sinn hlut. Anna frétti af keppninni og hafði samband við Elísabetu sem var til í slaginn. Saman fóru þær í göngu á Esjuna, þar sem fleiri hugmyndir gerðu vart við sig og einnig tillögur að þeim útfærslum sem lagðar voru inn í keppnina. Niðurstaðan varð að þær sendu inn þrjár hugmyndir. „Þátttaka okkar Önnu í keppninni var einskonar tilraunaverkefni um hvernig við ynnum saman og það má með sanni segja að útkoma tilraunarinnar hafi verið vonum framar!“ segir Elísabet. Þess má geta að þær eru nú að byrja að vinna saman að barnasögu sem kemur út á þessu ári.

Anna er með BA-gráðu í bókmenntum og ritlist frá Vermont College í Bandaríkjunum og jógakennararéttindi frá Kripalu Center í Bandaríkjunum. Anna gaf nýverið út sína fyrstu bók; barnasöguna Mjallhvítur. Elísabet er teiknari með BA-gráðu frá University College for the Creative Arts í Bretlandi og hefur tekið þátt í sýningum í Bretlandi og Belgíu en hélt sína fyrstu einkasýningu síðastliðið vor í Galleríi Sævars Karls.

Þema keppninnar var „Ísland í jákvæðu ljósi“ – og var þar skírskotað til þess jákvæða krafts sem býr í menningunni, náttúrunni og fólkinu. Sérstök aukaverðlaun að verðmæti kr. 50.000 verða svo veitt fyrir „Jákvæðustu tillöguna“. Þau verða kynnt við útgáfu á Símaskránni í vor. Ekki verður gefið upp nú hver tillagnanna þriggja hreppti efsta sætið – hulunni verður svipt af forsíðunni á útgáfudeginum í vor. Hins vegar má sjá verðlaunatillögurnar þrjár á slóðinni http://ja.is/um/simaskra-2010/.

Nánari upplýsingar: Guðrún María Guðmundsdóttir, ritstjóri Símaskrár, sími 861 6655 og verðlaunahafarnir Anna Ingólfsdóttir, sími 893 9723, og Elísabet Brynhildardóttir, sími 662 3183