Símaskráin 2010 komin út – sýning á 1.500 forsíðutillögum opnuð á Já.is

Sýning á öllum 1.500 tillögunum sem bárust í forsíðusamkeppni Símaskrárinnar 2010 í vetur hefur verið opnuð á Já.is. Verðlaunatillagan „Mundu mig – ég man þig“ eftir þær Önnu Ingólfsdóttur rithöfund og Elísabetu Brynhildardóttur myndlistamann prýðir forsíðu Símaskrárinnar, sem kom út í dag. Sérstök aukaverðlaun voru ennfremur veitt fyrir „jákvæðustu tillöguna“.

Samstarf Önnu og Elísabetar hófst sl. haust þegar þær ákváðu að gera saman barnabók. Til að kynnast verklagi hvorrar annarrar betur ákváðu þær að taka þátt í forsíðusamkeppninni. Ein af hugmyndunum sem kviknuðu tengdist gömlu minningabókunum og hinni hugljúfu vísu „Mundu mig – ég man þig“. „Þessi einlæga mynd er tekin úr minningabók frá 1971 þar sem tíu ára stúlka skrifar kveðju til vinkonu sinnar, eins og margar stúlkur á öllum tímum hafa sent til vina sinna í gegnum íslenskar minningabækur. „Mundu mig – ég man þig“ er gömul og falleg kveðja sem er rótgróin í samskiptasál okkar Íslendinga og eign okkar allra og því tilvalið að nota hana á forsíðu Símaskrárinnar sem geymir nöfn Íslendinga,“ segja þær Anna og Elísabet.

Þema keppninnar var „Ísland í jákvæðu ljósi“ – og var þar skírskotað til þess jákvæða krafts sem býr í menningunni, náttúrunni og fólkinu. Sérstök aukaverðlaun voru veitt fyrir „Jákvæðustu tillöguna“. Þau hlaut Hildur Bjarnadóttir arkitekt. Hún segist hafa hvatt tólf ára son sinn sem teiknar mikið í tölvu til að gera nokkrar tillögur. „Hann hafði nú engan tíma, svo ég ákvað að skella inn einni barnalegri mynd. Þar sem ég er ekki vön að teikna í svona fríhendisteikniforriti þá varð þetta útkoman; glaðleg, barnaleg, litrík og jákvæð mynd,“ segir Hildur, sem annars er vanari að teikna í arkitektaforritum með beinum línum.

Auk þess að geyma um 400.000 símanúmer er Símaskráin full af fróðlegu efni sem getur komið sér vel í dagsins önn. Sem dæmi má nefna kort af öllum landshlutum, götukort af bæjarfélögum og ýmsar hagnýtar upplýsingar fyrir þá sem eru að skipuleggja ferðalög. Þar er að finna upplýsingasíður um sundlaugar og golfvelli, yfirlit yfir viðburði og bæjarhátíðir um land allt í sumar og lands- og svæðisnúmer erlendis. Gulu síðurnar eru fremst og innihalda rúmlega 2.000 vöru- og þjónustuflokka. Við leit á Gulu síðunum þarf ekki að vita nafn fyrirtækis, heldur er nóg að fletta upp á leitarorði, t.d. læknir, málari eða hárgreiðslustofa. Símaskráin er umhverfisvæn og pappírinn í henni kemur úr sjálfbærum skógum. Blek, lím og pappír sem notað er í bókina er að öllu leyti niðurbrjótanlegt og algjörlega skaðlaust náttúrunni. Hvert eintak vegur um tvö kíló og er bókin 1.560 blaðsíður. Hin hefðbundna Símaskrá er afhent án gjalds en harðspjaldaútgáfan kostar kr. 700. Ritstjóri Símaskrárinnar er Guðrún María Guðmundsdóttir.

Á höfuðborgarsvæðinu er hægt að nálgast Símaskrána í verslunum Krónunnar, Símans, Vodafone og á bensínstöðvum Skeljungs og Olís. Á bensínstöðvunum og hjá Símanum við Ármúla eru einnig móttökugámar fyrir eldri Símaskrár. Á landsbyggðinni er Símaskráin afhent á öllum afgreiðslustöðum Póstsins þar sem einnig er tekið við eldri skrám. Einnig er hægt að nálgast skrána í verslunum Símans og Vodafone á Akureyri. Á dreifbýlustu svæðunum sér Pósturinn um að keyra Símaskrána heim til viðtakenda.

- Sýning á innsendum tillögum

Vinningstillagan - forsíða Símaskrárinnar 2010:

- Auglýsingar á Gulu síðurnar
- Rammaðu þig inn
- Ráðgjafar á fyrirtækjasviði

Allar nánari upplýsingar um nýskráningu eða breytingar á skráningum hér

Skrifstofa Já er opin frá kl. 8:15-16:15 virka daga.

Vefsíða: www.ja.is