Hljómahöll
Upplýsingar

ROKKSAFN ÍSLANDS

Rokksafn Íslands er glænýtt safn um sögu popp- og rokktónlistar á Íslandi. Safnið er staðsett í Hljómahöll í Reykjanesbæ. Þar er sagan tónlistar á Íslandi sögð allt frá árinu 1830 til dagsins í dag á mjög lifandi máta með aðstoð ljósmynda, skjáa og skjávarpa. Gestir fá afhenta spjaldtölvu svo þeir geti kafað enn dýpra í söguna. Á safninu er hljóðbúr þar sem gestir geta leikið lausum hala og prófað sig áfram á rafmagnstrommusett, gítar, bassa og hljómborð. Á meðal þeirra hluta sem hægt er að skoða á safninu er trommusettið hans Gunnars Jökuls sem hann notaði m.a. á ...Lifun með Trúbrot, rafmagnsgítar Brynjars Leifssonar úr Of Monsters and Men, LED-ljósabúning Páls Óskars, tréskúlptúr af reggí-hljómsveitinni Hjálmum, flugvélabúningur úr myndbandi Sykurmolanna við lagið Regínu, sex metra háar myndir af Hljómum, Björk, Sigur Rós og Of Monsters and Men og þannig mætti lengi telja.

STAPI

Hið sögufræga félagsheimili Stapi er stærsti salur Hljómahallar og getur tekið allt að 750 gesti á standandi tónleikum og dansleikjum. Stapi tekur allt að 450 gesti í sæti og þar af eru rúmlega 100 sæti á svölum.

BERG

Berg er kjörinn fyrir tónleika, fundi og ráðstefnur. Berg býr yfir fullkomnu og öflugu hljóðkerfi, skjávarpa og sýningartjaldi. Í salnum eru 104 sæti. Stólunum er raðað á bekki í sjö stighækkandi raðir. Stólarnir eru einstaklega þægilegir en þeir heita Magni og eru hannaðir af Valdimar Harðarsyni arkitekti. Salurinn Berg er skírður í höfuðið á Hólmsbergi í Keflavík sem í daglegu tali er nefnt „Bergið“.

MERKINES

Salurinn Merkines hentar vel undir viðburði s.s. fermingarveislur, afmæli, fundi o.s.frv. Merkines virkar einnig sem framlenging á Stapanum en það getur komið sér vel ef um stórt borðhald í Stapa er að ræða eða stóran dansleik. Salurinn er skírður eftir fæðingarstað Ellýar og Vilhjálms Vilhjálmssonar í Höfnum.

FÉLAGSBÍÓ

Félagsbíó er afar flottur salur í þægilegri stærð. Bíóið er notað á daginn í Rokksafni Íslands þar sem heimildamyndir um íslenska tónlist eru sýndar. Hægt er leigja salinn á morgnana og kvöldin en hann hentar mjög vel undir litla fyrirlestra með glærusýningum. Í salnum er stórt breiðtjald, góður skjávarpi og fullkomið 7.1 hljóðkerfi. Salurinn er skírður í höfuðið á Félagsbíó, kvikmyndahúsi sem var lengi vel starfrækt í Keflavík. Í Félagsbíói voru lengi vel höfuðstöðvar Leikfélags Keflavíkur auk þess sem margir tónleikar fóru fram þar.

Já notar vefkökur til að bæta notendaupplifun á vefsíðunni og greina umferð um hana. Einnig hefur Já uppfært persónuverndarstefnu sína. Nánar um stefnuna og vefkökur hér.
Samþykkt